Technology Khabar २२ पुष २०७२, बुधबार
काठमाडौं ।
काठमाडौं, २२ पुस । आजभोली हरेकको हातमा मोबाइल हुनु सामान्य विषय भईसक्यो । संचारको साधनको रुपमा निकै सस्तो साधन मोबाइल भएको हरेकको हातमा भएका विभिन्न ब्राण्डका मोबाइल हेर्दा थाहा हुन्छ ।
अझ आजभोली स्मार्टफोनको प्रयोग पनि ह्वात्त बढेसँगै मोबाइलमा नै हरेक प्रकारको काम गर्ने व्यक्तिहरुको संख्या पनि बढिरहेको छ । तर मोबाइल प्रयोगमा होस पुर्याएन भने दुर्घटना पनि हुनसक्दछ भन्ने हेक्का कम व्यक्तिले मात्र राख्दछन् । नेपालको पूर्वी जिल्ला पाँचथरमा मोबाइल पड्किएर एकजना घाईते भएका छन् ।
पाँचथर फिदिम वार्ड नम्बर एकका बुद्धराज लिम्बूको मोबाइल पड्किँदा झण्डै उनले ज्यान गुमाउनु पर्यो । मोबाइल ज्याकेटको गोजीमा राखेर मोटरसाइकल चलाईरहेका उनको मोबाइल पड्किँदा ज्याकेटमा अचानक आगो लाग्यो । उनको मोबाइल अन्य बटुवाले सुन्ने गरी नै पड्किएको बताईएको छ ।
मोबाइल पड्किएर आगो लागेपछि लिम्बू आत्तिए र ज्याकेटमा आगो सल्किएर बलेपछि अन्य व्यक्तिहरुले हतारमा पानी खन्याएर आगो निभाएका थिए । आगो निभेर ज्योकटमा भएको मोबाइल हेर्दा मोबाइल पड्किएर आधा भाग उछिट्टिएको थियो ।
लिम्बूले डिटिसी (Dtc) ब्राण्डको मोबाइल प्रयोग गरेका थिए, जुन ज्याकेटमा राखेको बेला पड्किएको नागरिकन्यूज डटकमले उल्लेख गरेको छ । राम्रो ब्याट्रि क्षमता, रेडियो, टर्च राम्रो बल्ने भन्दै पछिल्ला दिनहरुमा यो मोबाइलको प्रयोग बढिरहेको थियो । मोबाइल राम्रै चार्ज भएको र अन्य केहि नचलाएको बेला मोबाइल पड्किएको लिम्बूले बताए । लिम्बूले धन्य बाँचिएको र मोबाइल केहि नगरी गोजीमा राखेको बेला पनि पड्किएको बताए ।
बजारमा विभिन्न ब्राण्डका मोबाइलहरु भएपनि गुणस्तरहिन चीनियाँ मोबाइलहरु प्रयोगमा अधिक जोखिम रहेको छ । विगत दिनदेखि नै डिटिसी ब्राण्डको मोबाइल सिंगापुरको ब्राण्ड भन्दै मुलुकभर बिक्री बितरण हुँदै आएको छ । यो ब्राण्डको मोबाइल नेपालमा कल मोबिलिटी प्रालिले बिक्री गर्दै अाएको छ ।
प्रकाशित: २२ पुष २०७२, बुधबार