एप्पलको आईफोन सिक्स एस तथा सिक्स एस प्लसले सबै बिक्री रेकर्ड तोड्यो

काठमाडौं ।

काठमाडौं, १२ असोज । एप्पलले हालै सार्वजनिक गरेको नयाँ आईफोन सिक्स एस तथा सिक्स एस प्लसको किर्तिमानी बिक्री रेकर्ड कायम गरेको घोषणा गरेको छ । एप्पले यी दुबै फोनहरु एक हप्ता अगाडि मात्र सार्वजनिक गरेको छ ।

एप्पलले दुबै स्मार्टफोनहरु १३ मिलियन अर्थात १ करोड ३० लाख भन्दा बढि यूनिट पहिलो तिन दिनमा नै बिक्री गरेको दाबी गरेको छ । कम्पनीले यो फोन विश्वका १२ मुलुकहरुमा मात्र बिक्री शुरु गरेको थियो । एप्पलले हाल यो फोन अष्ट्रेलिया क्यानाडा, चीन, फ्रान्स, जर्मनी, हंगकंग, जापान, न्यूजिल्याण्ड, प्यूर्टो रिको, सिंगापुर, बेलायत तथा अमेरिकामा मात्र बिक्रीका लागि उपलब्ध गराएको छ ।

कम्पनीले यसअघि सार्वजनिक गरेको आईफोन सिक्स तथा सिक्स प्लस कुल १ करोड यूनिट मात्र बिक्री भएको थियो भने यसअघि आईफोन फाईभ एस तथा फाईस सी ९० लाख यूनिट मात्र बिक्री भएको थियो ।

एप्पलका सिईओ टिम कुकले पहिलो तीन दिनमा आईफोन सिक्स एस तथा आईफोन सिक्स प्लसको बिक्री उत्कृष्ट भएको बताए । उनले पहिलो सातामा नै सबै रेकर्डहरु टुटेको स्पष्ट पारे ।

एप्पले बिक्रीलाई बढाउँदै केहि दिनमा नै विश्वका थप ४० मुलुकहरुमा सिक्स एस तथा सिक्स एस प्लसको बिक्री गर्ने जनाएको छ ।

आउँदो अक्टोबर ९ तारिखदेखि ताईवान, स्पेन, स्विट्जरल्याण्ड, स्विडेन, अष्ट्रिया, डेनमार्क, रसिया, स्लोभाकिया, नर्वेलगायतका मुलुकहरुमा बिक्री शुरु गर्ने एप्पलले जनाएको छ ।

त्यसैगरी अक्टोबर १० तारिखदेखि बहराईन, जोर्डन, कुवेत, कतार, साउदी अरेयिबा र यूएईमा आईफोन सिक्स एस तथा सिक्स एस प्लस उपलब्ध हुनेछ भने अक्टोबर १६ तारिखदेखि भारत, मलेशिया र टर्किमा सार्वजनिक हुनेछ । बाँकी १३० मुलुकहरुमा भने यो वर्षको अन्त्यमा मात्र उपलब्ध हुने बताईएको छ ।

कम्पनीले विभिन्न देशहरुमा नयाँ आईफोन उपलब्ध हुने मिती तोकेपनि ती मुलुकहरुको खरिद मूल्य भने पछि तोक्ने बताईएको छ ।